Minnesota Lisu Church of Jesus

ꓟꓲ-ꓠꓰ-ꓢꓳ-ꓔ ꓡꓲ-ꓢꓴ ꓬꓰ-ꓢꓴ ꓘꓴ-ꓜꓲ-ꓞꓳ

St. Paul, MN


Find Out More

ꓥꓪ ꓠ ꓙ ꓖꓴ ꓐꓰ꓾ ꓔꓱ ꓚꓵˍ ꓟ ꓐꓰ ꓢꓯ ꓟꓬ ꓥ ꓡꓳ= (ꓬꓳ 14: 6)

I am the way, the truth and the life. (John 14:6)

ꓜꓲ ꓓꓴ ꓙꓵ,

ꓢꓲ ꓒ ꓦꓬ ꓠꓬꓲ ꓢꓳ ꓦꓲ: 10:00am
ꓟꓳ ꓡꓳ ꓪ ꓘꓴ ꓜꓲ ꓓꓴ: 11:00am
ꓤ ꓟꓶ ꓤ/ꓞꓳ ꓑ ꓤ ꓪ ꓘꓴ ꓙꓵ : 1:00 pm

ꓠꓬꓲ ꓖꓴ ꓐꓰ ꓝ. ꓖꓴ

ꓘꓴ-ꓜꓲ-ꓞꓳ ꓟꓬꓱ ꓟꓯ ꓢꓴ


ꓣꓰꓦ. ꓓꓣ. ꓡ‐ʼꓪꓴ

pastor@mnlisu.com

ꓟꓸ ꓒ ꓣ‐ꓠꓲ

(ꓪ ꓘꓴ ꓜꓲ ꓓꓴ)

ranynaw@mnlisu.com

ꓟꓸ ꓒ ꓤ‐ꓜꓱ‐ꓒꓴ ꓐꓰ ꓦꓲ ꓢꓲ ꓟ ꓠ‐ꓠ‐ꓝꓲꓢꓧ

(ꓘꓴ‐ꓜꓲ‐ꓞꓳ ꓟꓴ ꓖꓪ ꓢꓯ ꓐꓰ ꓞꓳ ꓡꓱ)

zarzwinphu@mnlisu.com

ꓟꓸ ꓟ ꓐꓬ-ꓟꓶ-ꓢꓶ

(ꓙꓲ‐ꓢꓴ ꓢꓲ ꓤ ꓢꓷ ꓠꓲ)

byamasee@mnlisu.com

ꓘꓴ‐ꓜꓲ‐ꓞꓳ ꓚ ꓟꓲ


ꓘꓴ‐ꓜꓲ‐ꓞꓳ ꓕꓱ ꓟ ꓔꓯ꓾ ꓡꓳ‐ꓟꓲ ꓟꓵ ꓗꓪ ꓐꓰ ꓡ ꓟ ꓟꓯ ꓛꓰ ꓟꓯ ꓑꓬ ꓢꓴ ꓡꓲ‐ꓢꓴ ꓕꓲ ꓜꓴ ꓤ ꓡꓰ꓾ 2010‐ꓘꓳ 6‐ꓦ ꓬꓲ ʼꓪꓴ. ꓕꓲ ꓠ ꓗꓪ ꓐꓰ꓾ ꓕꓲ ꓦꓲ ꓗ ꓠꓯ ꓕꓲ ꓦꓲ ꓪ ꓘꓴ ꓚꓳꓺ ꓢꓲ ʼꓪꓴ ꓔꓴ ꓔ ꓡꓳ꓿ ꓕꓲ ꓘꓳˍ ꓡꓰ ꓕꓲ ꓘꓳ ꓞꓳ ꓤ ꓟꓬ ꓡ ꓠꓬꓲ꓾ 2013‐ꓘꓳ ꓛꓲ ꓡ ꓕꓯ ꓞꓳ ꓤ ꓮ ꓡ 60‐ꓣꓳ ꓛꓲ ꓙꓳ ꓡ ꓡꓳ꓿ ꓖꓳ ꓟ ꓑꓶ ꓓꓴ ꓡꓲ‐ꓢꓴ ꓟꓬꓽ ꓐꓱ ꓔꓬ ꓖꓴ ꓐꓰ ꓟꓽ ꓶꓽ ꓟ ꓖꓴꓢꓔꓮꓦꓴꓢ ꓮꓓꓳꓡꓑꓧꓴꓢ ꓡꓴꓔꓧꓰꓣꓮꓠ ꓪ ꓘꓴ ꓦꓲ ꓗꓪ꓾ ꓦꓲ ꓢꓲ ꓐꓴ ꓠꓲ ꓒꓴ ꓒꓴˍ ꓡꓰꓽ ꓘꓳ ꓣꓴ ꓖꓶ ꓡ ꓟ ꓗꓪ ꓐꓰ꓾ ꓗ ꓛꓲ ꓛꓲˍ ꓡꓰꓽ ꓚꓵ. ꓓꓵ ꓙꓰ ꓢꓲ ꓪ ꓘꓴˍ ꓡꓳ꓿

ʼꓪꓴ‐ꓢ ꓡꓰ ꓬꓲ ꓘꓴ ꓜꓲ ꓞꓳ ꓔꓯ ꓕꓲ ꓕꓲ. ꓗ ꓠꓯ ꓕꓲ ꓕꓲ. ꓔꓯ ꓔꓴ ꓖꓶ ꓡ ꓡꓳ꓿ ꓬꓲ ʼꓪꓴ ꓕꓯ ꓪ ꓘꓴ ꓦꓲ ꓠꓯ ꓘꓪ ꓗꓳ, ꓗꓪ ꓕꓲ ꓘꓳ꓾ ꓗ ꓠꓯ ꓪ ꓜꓲ ꓙꓲˍ ꓟ ꓖꓪ ꓜꓴ ꓡꓰ. ꓖꓴ ꓗꓳ, ꓗꓪ ꓕꓲ ꓘꓳ꓾ ꓖꓳ ꓟ ꓗ ꓠꓯ ꓮ ꓘꓶ ꓗ ꓘꓪˍ ꓟ ꓪ ꓘꓴ ꓗꓳ, (ꓚꓧꓮꓑꓰꓡ) ꓗꓪ ꓕꓲ ꓘꓳ꓾ ꓪ ꓘꓴ ꓝꓲ ꓡ ꓡꓳ꓿

ꓖꓳ ꓗ ꓠꓯ ʼꓪꓴ‐ꓢ ꓡꓰ ꓕꓵ ꓪ ꓐꓰ ꓢꓯ ꓪ ꓖꓶ ꓡ ꓠꓬꓲ꓾ ꓪ ꓘꓴ ꓦꓲ ꓬꓲ ꓔꓱ ꓬꓲ ꓕꓲ ꓦꓲ ʼꓪꓴ ꓟꓶ ꓡꓰꓳ꓿ ꓪ ꓘꓴ ꓦꓲ ꓕꓱ ꓟ ꓠꓬ ꓧꓶ ꓕꓯ ꓪ ꓘꓴ ꓔꓬ ꓖꓴ꓾ ꓡꓲ‐ꓢꓴ ꓟꓬ ꓐꓱ ꓔꓬ ꓞˍ ꓟ ꓐꓰ 25 ꓧꓶ ꓛꓲ ꓤ ꓡꓰꓽ ꓟꓳ ꓓꓳ ꓫꓵ. ꓛꓵˍ ꓡꓳ꓿ ꓖꓳ ꓟ ꓔꓯ ꓢꓲ ꓤ ꓐꓴ ꓮ ꓙꓵ ꓠꓲ ꓒꓴ ꓒꓴˍ ꓡꓰ ꓠꓲ ꓧꓳ, ꓢꓲ ʼꓪꓴ ꓔ ꓡꓳ꓿ ꓮ ꓡꓲꓳ ꓐꓯ ꓠꓬ꓾ ꓪ ꓘꓴ ꓦꓲ ꓕꓱ ꓟ ꓠꓬ ꓟꓽ ꓶꓽ ꓟꓽ ꓠꓶꓽ꓾ ꓟꓽ ꓫꓵꓼ ꓟꓽ ꓐꓰꓽ꓾ ꓟꓽ ʼꓪꓴꓽ ꓟꓽ ꓣꓳ꓾ 150‐200 ꓣꓳ ꓛꓲ ꓪ ꓘꓴ ꓓꓲˍ ꓟ ꓥ ꓠꓬꓲ꓾ ꓮ ꓟꓶ 100‐ꓣꓳ ꓛꓲˍ ꓡꓰꓽ ꓙꓳˍ ꓢꓰ ꓟ ꓣꓳ ꓘꓴ‐ꓜꓲ‐ꓞꓳ ꓐꓱ ꓶ ʼꓪꓴ‐ꓢ ꓡꓰ ꓮ ꓠꓱ ꓕꓯ ꓡꓰ ꓙ ꓖꓶ ꓔ ꓖꓶˍ ꓟ ꓥ ꓡꓳ꓾ ꓐꓰ ꓘꓳ ꓣꓴˍ ꓡꓳ꓿

ꓟꓬꓱ ꓟꓯ ꓢꓴ ꓟ ꓒ ꓟ ꓟ ꓐꓴ

ꓘꓴ‐ꓜꓲ‐ꓞꓳ ꓔꓶ ʼꓪꓴ ꓔꓴˍ ꓕꓯ꓾ ꓟ. ꓒ ꓟ ꓙꓳ ꓠꓬꓲ ꓶ ꓥꓳ ꓟ ꓚ ꓚ꓾ ꓢꓷ ꓙ ꓟꓳ ꓙˍ ꓟ ꓡꓰꓽ ꓬꓰˍ ꓡꓳ꓿ ꓦ ꓐ ꓕꓲ ꓟ ꓛꓲ ꓙꓳ ꓡ ꓕꓯ꓾ ꓠꓰꓪ ꓬꓳꓣꓗ ꓲꓔꓧꓮꓚꓮ ꓗꓪ ꓔꓬ ꓟ ꓣꓰꓦ. ꓓꓣ. ꓡ‐ʼꓪꓴ ꓔꓯ ꓙ ꓡꓯ ꓘꓳ ꓢꓲ ꓳꓠꓡꓲꓠꓰ ꓗꓪ ꓐꓰ ꓒꓬꓱ ꓔꓳ ꓟꓬ ꓔꓳ ꓕꓲ ꓠˍ ꓡꓰ ꓕꓲ ꓠ ꓶ ꓥꓳ ꓚꓺ ꓝꓲˍ ꓡꓳ꓿ ꓖꓳ ꓡꓱ ꓬꓰˍ ꓟ ꓦ ꓐ 3‐ꓟ ꓛꓲ ꓙꓳ ꓡ ꓕꓯ꓾ ꓘꓴ‐ꓜꓲ‐ꓞꓳ ꓡꓰ ꓬꓲ ꓔꓯ ꓟ. ꓒ (ꓑꓮꓢꓔꓳꓣ) ꓬꓰ ꓖꓶ ꓡ ꓠ ꓟ ꓘꓴ ꓢꓲ ꓚꓵ. ꓛꓲ ꓡ ꓡꓳ꓿ ʼꓪꓴ‐ꓢ ꓠꓬ ꓬꓲ ꓘꓴ‐ꓜꓲ‐ꓞꓳ ꓔꓯ ꓬꓲ ꓔ ꓙ ꓠꓬꓲ ꓙ ꓢꓲ꓾ ꓐꓲ ꓜꓲ ꓡ ꓝꓲ ꓔꓬ ꓟ ꓑꓶ ꓓꓴ꓾ ꓟ ꓒ ꓣ‐ꓠꓲ ꓠꓬ 2014‐ꓘꓳ ꓗꓪ꓾ ꓟ ꓒ ꓤ‐ꓜꓱ‐ꓒꓴ ꓠꓬ 2015‐ꓘꓳ ꓗꓪ꓾ ꓟ ꓟ ꓐꓬ‐ꓟꓶ‐ꓢꓶ ꓠꓬ꓾ 2016‐ꓘꓳ ꓗꓪ ꓚꓵ. ꓛꓲ ꓡ ꓡꓳ꓿

ʼꓪꓴ‐ꓢ ꓠꓬ꓾ ꓬꓲ ꓠꓲ ꓡꓶ ꓔꓯ ꓟꓴ ꓗꓪ ꓕꓯ ꓢꓲ ꓗꓪ ꓐꓲ ꓞ ꓟ ꓡꓰ ꓐꓰ꓾ ꓟꓲ ꓠꓯ ꓗꓪ ꓥ ꓟꓲ ꓐꓲ ꓡꓰ ꓝꓲ ꓠ ꓟ ꓬꓲ ꓘꓴ‐ꓜꓲ‐ꓞꓳ ꓔꓯ ꓬꓲ ʼꓪꓴꓽ ꓡ ꓟꓬꓽ ꓡ꓾ ꓢꓯ ꓙꓳ ꓡ ꓝꓲ ꓔꓬ ꓡꓳ꓾ ꓐꓰ ꓙꓵ ꓢꓲ꓾ ꓶ ꓓꓰ ꓥꓳ ꓡꓳ ꓢꓯ ꓕꓵ ꓔꓬ ꓟ ꓐꓰ ꓕꓲ ꓡꓰꓹꓼ꓾ ꓘꓴ‐ꓜꓲ‐ꓞꓳ ꓐꓱ ꓶ ꓟꓽ ꓬꓰ ꓟ ꓓ ꓟ ꓶꓻ ꓥ ꓟ꓾ ꓶ ꓥꓳ ꓫꓱ ꓥꓳ ꓟꓬꓱ ꓔꓯ ꓥ ꓟꓲ ꓮ ꓡꓲ ꓐ ꓡ ꓠꓬ ꓮ ꓡꓲ ꓣꓱ ꓬꓰ ꓙꓰ ꓔꓬ ꓡꓳ꓿

ꓘꓴ‐ꓜꓲ‐ꓞꓳ ꓬꓰꓺ ꓟꓬꓱꓽ


ꓘꓴ‐ꓜꓲ‐ꓞꓳ ꓖꓪ ꓜꓴ

ꓢꓲ ꓒ ꓦꓬ ꓠꓬꓲ ꓢꓳ ꓦꓲ ꓤ ꓠꓱ ꓐꓴ

ꓘꓴ‐ꓜꓲ‐ꓞꓳ ꓢꓯ ꓧꓪ. ꓗ ꓠꓯ

ꓞꓳ ꓡꓱ ꓐꓴ

ꓐꓬꓱ ꓡꓳ ꓖꓴ

Minnesota Lisu Church of Jesus

ꓝꓮꓚꓰꓐꓳꓳꓗ ꓗꓪ ꓐꓬꓱ ꓐꓰ ꓦꓲꓓꓰꓳ ꓝ ꓢꓲ ꓡꓳ ꓠꓬꓲ ꓡꓯ=